لقاء هدهود في إذاعة العربية

بدأ اللقاء بأغنية بيستاهل قلبك و هادي ما شاء الله عليه كان شقي من البداية .
بلش اللقاء بتحية من المذيع إيلي حوشان لكل الناس السهرانين و أعلن إنه اللقاء رح يمتد لساعة و نص من الوقت
هادي قاطعه و قال له: 24 ساعة و ضحك

إيلي : هادي سكوت شوي خليني قدمك / يضحك / كنت بدي قول مقدمة عنك و كلام كثير و بعدين بقدمك بس أنت قدمت حالك لحالك
هادي : أنا ببيتي ما في داعي تقدمني و لو بيكفي وجودك معي

إيلي : خليني قول المقدمة عنك ..هادي أسود بتلبقلك النجومية حتى لو ما حصلت على لقب سوبر ستار المهم انطلقت بهالمشوار
و الله وهبك مواهب سوبر بصوتك بطلتك بحضورك بحنجرتك الذهبية الدافية و محبة الناس الك كل هالمواهب السوبر بتجعل منك إنك تكون ستار عنجد أهلا فيك هادي أسود عبر العربية و رمضان كريم .

هادي : رمضان كريم عليك و على كل يلي عم يسمعنا و بصراحة خجلتني بهالمقدمة الحلوة بشكر إذاعة العربية لاستضافتها و كل يلي عم يسمعونا.... يلا معن ساعة من الوقت يتحملوا سآلتي (يضحك)

إيلي : هادي أكيد النتيجة بسوبر ستار ما أنصفتك بس محبة الناس الك رح تنصفك بالأيام القادمة و تعطيك حقك شرط إنت كمان تعطينا أغاني حلوة .

هادي : أكيد إن شاء الله يا رب أنا على طول بتمنى إني كون عند حسن ظن كل يلي بيحبني و بيسمعني و الله يقدرني و قدم كل شي حلو و يضل الدعم من الناس معي .

إيلي : قبل ما نفوت بالمواضيع يلي بدي أعرف عنا كل شي خلينا نرحب بزميلتنا رشا يلي رح ترافقنا باللقاء هاي رشا

رشا : هاي صباح الخير و رمضان كريم يا هادي يا ملك مثل ما الفانز تبعونك بيحبوا ينادولك و اليوم السهرة مضواية بوجودك هادي بدي خبرك انو الفانز من وقت ما عرفوا إنك الليلة ضيفنا بعتولك ورود و بطاقات و هدايا بيعبروا فيها عن حبن الك وقديش هنن مشتاقينلك
.
هادي : أكيد و أنا بحبن و مشتقلن أنا بدي أشكرن كثير و بدي قلن عنجد أنا بلاهن ما بسوى شي فإن شاء الله يزيدوا أكثر و أكثر و يضلوا معي لأنو وقفتن حدي أساس كل شي و أنا ما كثير شاطر بالتعبير لما القصة تفوت بحبي الن و عاطفتي تجاهن و ما بعرف كيف بدي أشكرن بس أكيد هنن عارفين يلي بقلبي تجاهن
.
إيلي : هادي إذا مش شاطر بالتعبير شاطر بالأغاني فيك تشكرن و تعبر لن عن محبتك بشي أغنية شو رأيك؟

هادي : أكيد و لو ../ غنى موال يا ما أنا و الليل لوديع الصافي /

إيلي : هادي إسمحلي انحني أمام هالموهبة يلي هي هبة من عند الله و أنت عم تعرف توظفها صح بالفعل أطربتنا و أتحفتنا .

/ حطوا مقطع من بيستاهل قلبك /

إيلي : عم نسمع بيستاهل قلبك من كلمات نزار فرنسيس و ألحان سمير صفير و توزيع ملحم أبو شديد خبرنا هادي كيف اخترت هالأغنية و على أي أساس اخترتا ؟

هادي : كان كل واحد يطلع من السوبر ستار يروح يختار أغنية و أنا لما طلعت رحت لحتى أختار أغنية أنا و الأستاذ عبد الله القعود و الدكتور نديم المنلا وسمعنا كم غنية فأنا ما خرطوا مشطي (يضحك)

يقاطعه إيلي: عيدا هي حلوة منك .

هادي : ما خرطوا مشطي هي عنا باللغة الشامية الثقيلة و معناها ما دخلوا عقلي و أنا ما حبيتن و في منن طلعوا و تغنوا و هنن حلوين بس أنا ما حسيت فين بعدين سمعت 5 أغاني من عند سمير صفير و كلن حلوين فضعت و استشرت الأستاذ عبد الله القعود الي هي حلوة و سمعني غنيتين و من ضمنن هلأ أغنية ديانا كرازون العمر ماشي هي حلوة كثير بس هنن نصحوني بأغنيتي بيستاهل قلبك لأنو حلوة للشب أكثر و هي كلامها للشب فأنا اقتنعت فيها و رجعت ع البيت و سمعتا و حاولت غنيا بس حسيتا صعبة شوي رجعت لعند الأستاذ عبد الله و قلتله أنا متردد شو رأيك قالي لأ الأغنية لابقتلك كثير و بالنهاية الواحد بدو يختار شي حلو على هوا السوق بتسوق بس مو لدرجة إني انزع حالي أنا بدي شي الناس تحبه كلمة حلوة لحن حلو و بنفس الوقت يبين قوة الصوت و الإحساس و العلم الموسيقي

إيلي : هادي باختصار أنت مقتنع بالغنية ؟؟

هادي : أي أكيد بس مو 100% و هي كغنية كثير حلوة أنا بالنسبة إلي من الأغاني يلي كثير بحبها بس أنا بعطيها 50 % حتى ضل
جيب أغاني أحلى و ما لازم أقتنع 100%

رشا : بس يا هادي هن قيموها إنها أحلى أغنية بالcd تبع سوبر ستار 2 ؟

هادي : الحمد لله هدا فضل من الله و هي أغنية مو بس كونها من كلمات نزار فرنسيس و ألحان سمير صفير .. هلأ أنا شخصيا بعطيها أكثر من 100% بس لازم ضمنيا كون مقتنع بس 50 % حتى جيب أكثر مشان تاني مرة نزل غنية أحلى و إلا إذا هيك بضل نزل نفس الأسلوب الناس بتمل لازم على طول نزل شي جديد

رشا : هادي شو في بعد هالغنية ؟؟؟

هادي : هلأ ب 27 – 28 الشهر تصوير الكليب ببيروت مع المخرج هادي أبي وردة و رح يكون في بنت بالكليب .. سبق و قلت
هيك قالولي ليش بدك تحط بنت اعمل مثل أخوك شادي و ما تحط بنت أنا قلت بالنسبة إلي الدنيا بلا بنات ما بتسوى شي / يضحك / البنات
زينة الدنيا / يضحك /

إيلي : الكليب من إنتاج مين رح يكون ؟؟

هادي : يضحك .. من إنتاجي الخاص

إيلي : طيب ليش ما تكفلوا فيك يلي أنتجوا الغنية ؟؟

هادي : / يضحك / ما في حدا إجا يفكر يدعمني و أنا بطبيعتي ما بطلب

إيلي : طيب ليش شو القصة ؟؟

هادي : ليك إيلي رح نعتبر إنك أنت المنتج و بدك تعمل cd بيكلفك 150 ألف دولار و بدك مردود و نتيجة و أنت حطيت 150 ألف دولار هدول حق الأغاني طيب ما بدك 100 ألف دولار أقل شي إعلانات الن و تسويق و ترويج فأنت حطيت 150 الأولى
و ما حطيت 100 الثانية و ما سوقت و ما أهتميت بالإعلان فللأسف ال150 راحوا .

إيلي : بتعتب يعني بيقولوا العتب على قد المحبة؟

هادي : أنا بعتب.. كمان و بدايق على حالي و على أصحابي هلأ في ناس لحالن انطلقوا و عملوا cd خاص لوحدن مثل عمار حسن الألبوم رح ينزل و حسام مدنية كثير حلو ال cd تبعولو يلي بوجهلوا تحية هو إنسان كثير شاطر و ذكي الألبوم تبعو كثير كثير حلو أنا حبيته و بحبه لحسام و إن شاء الله من احسن لأحسن و عقبالنا / يضحك / . الكليب من إنتاجي بس الأغاني لسه ما بلشت اسمع يمكن بدي امضي مع شركة / good news/ في مشاورات هلأ

هادي : إيلي و رشا وين بدنا نتسحر اليوم أنا عم فكر بباب توما / يضحك /

إيلي : / يضحك / هادي بدنا نحكي شوي جد لقيت الدعم من بلدك متل ماصار مع رويدة عطية من قبلك ؟؟

هادي : أنا بدي وجه تحية لرويدة عطية يلي أنا بحبا كثير و بهنيا على الكليب يلي طالعة فيه مثل القمر .. مشان السؤال .. شي بيزعل إذا بقلك إني ما لقيت الدعم .. لأ .. لقيت الدعم من الجمهور و الشعب السوري بس من الشركات و المسؤولين بصراحة لأ بس أنا يلي بيهمني هو الدعم من الناس أولا و أخيرا و هاد شرف إلي و هذا بيعطيني دافع إني ما كون مغرور و أنا ما رح خبرك إذا أنا مغرور أو لأ الناس هي يلي بتحكم و بتخبرك يلي إلهن فضل عليي بس أنا عتلان هم بعد ما صور الكليب وين رح ينعرض لأنو أنا ما عندي كثير علاقات مع الفضائيات..

إيلي : و قتا بتكون بعت السيارة مشان الكليب .. / يضحك / ..

رشا: على فكرة ألف الحمد لله على السلامة هادي هو تعرض لحادث كتر خير الله يعني انقضى بالسيارة مش مهم المهم انو هادي بخير أتعرض لشوية رضوض برأسه و بصدره و بأجريه

هادي مقاطعا : بس ما بيكفي / يضحك /

إيلي : هو بصحة كتير منيحة بس بدي قلك مرة ثانية انتبه بالسواقة إذا بتريد

هادي : يعني الحق مش عليي الحق على يلي كب المازوت بالأرض و على الكميون يلي ضربني و على العامود يلي انكسر و وقع عليي أنا ما دخلني و أهلي ما كان معن خبر بس بعد يومين خبرناهن و أنا بعد الحادث صرت عم نام ع القاعد / يضحك /

رشا : رح أبدا آخذ الاتصالات
( تتصل هنادي / هادي بيقلها هنادي إنت بلا نون بتصيري هادي و يضحك / حكت هنادي مع هادي و طلبت أغنية لعبد الحليم )
هادي غنى أغنية / نبتدي منين الحكاية /

إيلي : هادي بدنا أغنية لوائل كفوري ، أنت غنيت تبكي الطيور بشكل كثير حلو

هادي : هي الأغنية حلوة و صعبة بنفس الوقت و على فكرة أنا و وائل أصحاب كثير و يوم يلي غنيت هالأغنية سمعني و قال لي أنت أحلى مين غنالي / يضحك / و قالي اختيار ذكي منك و أنت مو ناقصك غير شي غنية حلوة و مدير أعمال وراك و بتصير أحلى نجم ( حطوا أغنية بيستاهل قلبك بعدها )

إيلي : منرجع لنتابع لقائنا مع هادي أسود

هادي مقاطعا : هادي أبيض – يضحك –

ايلي:إن شاء الله أيامك كلها بيضا .. هادي كيف بتحب يعرفوا عنك .. الفنان هادي ، النجم هادي أو من نجوم سوبر ستار ؟

هادي : هادي أسود و بس لأنو الألقاب ما بتهمني أنا طميع بتهمني محبة الناس و بس .

رشا : بين الازدحام من المطربين و العجقة أنت هادي كيف بتقدر تبرز موهبتك و صوتك ؟؟

هادي : هلأ القصة صعبة بس بالنهاية الشي الصح رح يبين و بالدراسة أكثر و الشغل ع حالي أكثر و اختيار شي أصيل و عصري بنفس الوقت المهم الناس تحبه و يلي بيميز شخص عن شخص بصوته و إحساسه و طريقة تعامله مع الجمهور و طريقة لبسه كل شي بيفرق ..

إيلي : عم تشتغل على هالمحاور يعني عم تهتم بشكلك و بمظهرك و أناقتك طبعا إلى جانب الموهبة يلي عم تنميها بالدراسة ؟؟

هادي : أكيد بالنهاية لأني أنا بحب جمهوري لازم كون مرتب لازم قدم حالي بصورة حلوة و هن بالنهاية الحكم الأول على كل شي .

إيلي : ذوقك بالأغاني صعب طيب و باختيار التياب و اللوك صعب كمان ؟

هادي : لأ أنا بحب كل شي بسيط و رايق و خاصة اللون الأسود بحبه كثير

إيلي :راح نأخذ اتصالات من الناس و نسألن شو يلي لفت نظرن لهادي لما شافوه بالسوبر ستار
/اتصل شب اسمه يوسف و قال إنو الأستاذ هادي بيذكرنا ببداية الأستاذ راغب علامة ، هادي قاطعه تسلم حبيبي بس أنا مش أستاذ أنا هادي بس بكير لسه ع الأستاذ

إيلي : يوسف أعطي هادي وصية وحدة شو بتقله

يوسف: بدي قله شغلة وحدة بس انو يكون هادي ع المسرح و يضل متواضع متل ماهو بس

هادي : والله اسف حبيبي بس كتير صعب إني كون هادي ع المسرح ، يضحك

إيلي: هادي إذا بدنا نعمل مقارنة بين سوبر ستار 1 و سوبر ستار 2 ع المركز التالت بسوبر ستار 1 كان ملحم زين ، بسوبر ستار 2
كان لهادي ، اليوم بعد انتهاء البرنامجين ملحم زين بالمركز التالت بنجاح و أنت هادي وين؟ بتعمل مقارنة بينك و بين ملحم ؟

هادي : لأ أكيد ملحم موهوب و صوته حلو وبيستاهل و أنا كمان عندي موهبة بس الظروف ما قدرت تساعدني لأنو وفاة الحريري أثر ع الوطن العربي كله لهيك صار في أولويات بالمحطة و أنا ما كان عندي حظ منيح بس بالنهاية بأساس كل شي الله ما رح يعطي أي شخص إلا يلي بيستاهله و بياخده بالحياة

رشا : الكمبيوتر معلق شوي لأنو المسج كثيرة لهادي

هادي قاطعها : بهالشهر باين برج الأسد كثير منحوس هيك قالوا لي فما تستغربوا انو الكمبيوتر يعلق على حظي ، يضحك /

إيلي : عنا اتصال من عمر ( عمر بيطمن على هادي و يطلب أي أغنية من هادي)

إيلي : شو طباع البنت يلي بتحب تتقرب منا أو ترتبط فيا ؟؟؟؟؟

هادي : / يضحك / أول شي تكون طبيعية بدون عمليات تجميل ، كلها أنوثة ، بنت عيلة ، متعلمة و مثقفة ، مؤمنة بالله و بتحب الله كثير ، قلبها طيب و نظيف بتحب الناس ، و كريمة لأنو أنا ما بحب آخذ مرأة بخيلة أبدا لأنو رح تكون بخيلة على ولادي بالحنان و بخيلة عليي بالحب فإن شاء الله تكون كريمة و ما تكون نقاقة و تحب أمي و أبي و عيلتي و كل رفقاتي و بس / يضحك /
( غنى موال - عم أكذب عليكي - لوائل كفوري ) و ضحك و قال بس إن شاء الله ما ينفهم غلط أنا ما بحب أكذب ع البنات أنا
ما بقصد هالموال أنا كثير منحاز لجنس حوا أنا ما بضحك ع البنات / يضحك /

رشا : رح أبدا أقرأ شوي من المسجات مع إنهن كثار بس رح قول كم وحدة
1 _ هادي سلامة قلبك إن شاء الله أنا و لا أنت هادية من الشام
هادي :مقاطعا بعيد الشر عن قلبها
2 _ هادي نحن معك للأخير أنت و شادي و ما منقدر نتخلى عنكن إنتوا حياتنا عليا الشام
هادي: تانكيو عليا جهزي حالك لتباركي لشادي لأنو خلص ال cd و هو هلأ بالأردن عنده حفلات و قريبا بيصدر ال cd و الكليب
عن قريب رح ينزل الله يوفقه
3 _ هادي أنت بتعرف قديش منحبك و عم نبعتلك بوسة نسرين
هادي يضحك: و أنا كثير بحبكن كمان
4 _ هادي الحمد لله على سلامتك تقبرني الليلة أنت مثل العادة طالع قمر عليا الشام
هادي يضحك :تانكيو عليابس من وين عرفتي انو طالع قمر(يضحك)

رشا : و هلأ كمان رح ناخد اتصال من إياد

إياد: هادي مو بس البنات بتحبك و كمان نحن منحبك

هادي يضحك: و الله أنا هالشي بيبسطني أكثر بحس انو صوتي حلو أكثر

إيلي : بدي ارجع لموضوع العتب هادي قديش عطوك و قديش أهملت ، بدنا نحدد علاقتك بتلفزيون المستقبل ؟

هادي : أنا أهملت كثير و الله و أنا هلأ صرت لوحدي و هنن كثير كانوا مناح معنا بس هنن قصروا بسبب الحادث يلي صار بلبنان و وفاة الحريري صار في تقصير أكثر و قريبا رح نفسخ العقود معن و أنا بتأسف لهالشي و بتأسف لما بشوف التلفزيون يلي اتخرجت منه العواميد يلي فيه عم ترجع لورا ..

إيلي : اليوم إذا إجا تلفزيون المستقبل و قالك تفضل هادي نحن بدنا نتبناك وننتجلك cd و كليب ، بترجع بتم العلاقة ؟؟؟

هادي : أي أكيد ما في بواب مسكرة الفضل الرئيسي بيرجع الن و أنا بحبن كثير ..

رشا :رح ناخد اتصال من لبنى يلي بتحيي هادي و بتقله انو كله على بعضه حلو و كله متميز و بتقول ياريت كل سنة بيكون في واحد من عيلة أسود يشارك بالبرنامج

هادي مقاطعا و مازحا : لأ هلأ مفكرين بأبي لأنو بدنا نجوزه وحدة ثانية / يضحك كثير/

إيلي : خبرنا كيف تعاطوا أهلك مع النجومية ؟؟

هادي : / يضحك / خليني قلك شي أبي كان طوله لو فرضنا 160 صار 180 / يضحك /شاف حاله فينا بشعور أبوي بس
حتى لما منكون قاعدين مع الناس بتلاقي أبي ما بيحكي عنا بيحكي بطريقة عادية و ما بيشوف حاله ع الناس فينا و ما بيقول مثلا أنا أبو شادي و هادي أو إنن أولادي لأ أبي و أمي و لا أطيب من هيك ..

إيلي : بياخد اتصال من مروة يلي بتحيي هادي و بتشكر فيه ،،..

إيلي بيسأل هادي: هادي بتحس حالك مشروع نجم ؟

هادي : و الله أنا بآمن بموهبتي و انو لازم قويها بس بتمنى انو كون مشروع نجم

إيلي : أنا سألتك هالسؤال حتى أوصل لسؤال تاني و هو انو جيجي لامارا مدير أعمال نانسي عجرم أخدك ع جنب يوم كانت بالبرنامج شو قال لك ؟؟

هادي : جيجي لامارا إنسان لذيذ أخدني ع جنب و قالي يا ابني أنت كثير شب مرتب و كلن مناح بس أنت لازم تشتغل على حالك يعني لازم تنحف شوي بس صوتك ولا أروع من هيك الله يوفقك أنت مشروع نجم و نجم كبير .

إيلي : هادي قديش راهنت على جمالك ؟؟؟

هادي : و الله ما راهنت و حياة الله ما بعرف أنا ما بفكر بالقصة و لحتى قلك أنا قديش ما كنت مركز على شكلي بالسوبر ستار و ما كنت مركز على لبسي يعني شو ما جابوا لي ألبس و شلون ما عملوا لي شعري كمان كنت أستعجل و قلن بسرعة بدي روح أحفظ الغنية و كان همي المغنى وبس و آخر شي بلشت فكر انو المغنى بدو حضور و طلة و وقفة منيحة ع المسرح و التعامل مع الناس و أنا بس أتلبك و اخجل بقلبها ضحك و بخربط بالأغاني و صارت معي بآخر حلقة نسيت مقطع من أغنية وائل لأنو كنت مركز أكثر بأغنية وديع الصافي لأنو كانت أصعب و يومها أتمنيت انو يكون وائل ما سمعني و أنا عم غنيها لأنو كان نزل ضربني أنا متأكد / يضحك / غنيت له ياها غلط و صرت أنقل الكلام من البنات يلي قاعدين بوجهي صاروا ينقلوني ياها / يضحك /

إيلي أخد اتصال من صبية أسمها فادية و هادي عصب شوي لأنو كل يلي اتصلوا قالوا له أستاذ هادي

قالها : يا عمي أنا ماني أستاذ أنا هادي و بس و ضحك و غنت له فادية غنية قديمة و أهدتا خاصة لهادي بيقول أولها / بيصعب عليي بعدك عن عينيي / و طلبت أغنية من هادي و هو غنى موال أغنية يا ليل الصبر

إيلي : هادي عنجد نحن مننحني أمام صوتك الحلو صوتك صوت رباني

رشا: أنا اليوم مسحورة بهادي حسيت إني بعرفه من زمان من سحر صوته و تواضعه ما عم أعرف أحكي / تضحك /

هادي : شكرا شكرا و الله خجلتوني بتعرفوا أنا هلأ عم نقط عم دوب / يضحك / صار بدي انحط شوي تاني بالبراد لأني عم دوب
من هالكلام الحلو / يضحك/

إيلي : إذا بدنا ندخل ع الناحية الإنسانية بهادي شو يلي بيخليك تضحك من قلبك و شو يلي بيخليك تبكي و عيونك تدمع ؟؟

هادي : ليك لما شوف حدا بحبه عم يضحك من قلبه بضحك معه وبالنسبة ليللي بخليني ابكي رح احكيلك عن موقف صار معي ببيروت لما رحت على مستشفى أمراض السرطان إنقهرت تخيل بنت صغيرة بينادولها نانسي لأنها بتحب نانسي عجرم و عمرها 3 سنين ما فيها تعيش إلا إذا حطولها إبرة بأيدها تخيل و الأولاد طلبوني ألي بشكل خاص و رحت بدون ما آخد معي كاميرا لأني بعرف حالي رح ابكي و لما بتشوف هالشغلات بتقول الحمد لله يلي أخواتي بخير و كل يلي بحبن بخير و أنا بتمنالن الشفاء يا رب و قد ما فيك تحاول تساعدن ما رح تقصر ، حاولت أدخل ع الغرف بس ما قدرت صرت ابكي ، و الولاد تصوروا معي و عملوا لي حفلة و صاروا يغنوا معي ، ما بعرف شو بدي قلك كثير تضايقت .. ما بعرف.....

إيلي : لو بتعرفوا هادي فعلا عاش اللحظة كأنها هلأ لأنو دمعوا عيون هادي الحلوين ما كان قصدي خليك تدمع هدوش بس هاد دليل انو نابع من إحساسك الصادق انا فعلا بعتذر

هادي :أي حدا رح يشوف هالمنظر رح يبكي ، لأنو هاد أسمى شي بالحياة إنك تشوفن عم يضحكوا و هن يلي عايشين بأمل كبير و وقتها المستشفى شكرتني و قالوا لي انو زيارتك لعندن كانت منيحة كثير ، فأنا بتأمل انو أي حدا بيقدر يساعد هيك أشخاص ما يقصر بتمنى ..

إيلي : هادي للأسف الوقت داهمنا و بالنهاية بدي قول انو أنت عندك علاقات متميزة مع الناس و زملائك و كمان عندك علاقات فنية

هادي : يعني مو كثير عندي علاقات فنية لأنو أنا ما كثير بسهر ماني من هواة السهر أنا بحب البيت أنا بيتوتي.

إيلي : هادي بالنهاية بدي أشكرك إن شاء الله تكون استمتعت معنا و ما نكون ضايقناك بأي موضوع حكينا فيه و بدي قول للناس انو هادي أسمه على عكس فعله يعني هادي ما هدي الليلة / يضحك / بشكر كل يلي تابعونا و سهروا معنا كنتوا مع ضيفنا هادي أسود و تصبحوا على ألف خير و رمضان كريم

هادي : إيلي أنت أفضل مذيع بالنسبة إلي و شهادتي مجروحة فيك الله يوفقك و أنا بدي أشكركن أنا عذبتكن معي أكيد بعرف انو أنا ما عم أهدا و بدي أشكر كل الناس ، سهرناهن و رمضان كريم عليهن يعطين العافية و إن شاء الله يكونوا مبسوطين برمضان

إيلي : بيقولوا ختامها مسك و الليلة معك الختم بدنا نسمع أغنية ..

هادي : ولو أكيد أنا بدي اختم لوديع الصافي مع إني غنيت له كثير بس قد ما غنيت له ما بشبع / يضحك /

( غنى موال و لو لوديع الصافي )
النهاية

_________________

كيف بدي اشكرك ع مقابلة الحلوة يلي عاملها حلو وناقلها احلى

ع فكرة بصدفة وانا عم بقرا فيها عم بسمع لهدوش مرسي الك مرة تانية
_________________

مرسي ..:%4:
اللقاء كثير ظريف وحلو ...
لابل

_________________

يسلمو حياتي جنوني
ع اللقاء الرائع لرائع هدوش
...

_________________

الله يسلمك من كل شر
لولو ع الرد

_________________